KORONADAL CITY- Ginpabugal sa subong sang banwa sang Tulunan , North Cotabato ang pinaka-una nga babae nga fighter pilot sang Philippine Air Force (PAF) nga tumandok sang ila nga banwa sa diin nagdala sang kadunganan sa indi lang sang iya nga pamilya apang sa bug-os man nga lugar sang Tulunan.
Sa interview sang Bombo Radyo Koronadal kay Mr. Abraham Contayoso, Secretary to Mayor sang Tulunan, North Cotabato, ginpahayag sini nga indi matungkad sa subong ang ikadungganan nga gin dala ni 1Lt Jul Laiza Camposano-Beran sang 5th Fighter Wing sang PAF nga naka base sa Basa Air Base, Floridablanca, Pampanga.
Suno pa sa iya, magluwas sa isa ka fighter pilot sang PAF, isa man ka beauty queen si 1Lt Jul Laiza Camposano-Beran sa ila nga lugar.
Naghalin suno pa si 1Lt Jul Laiza sa simple apang naga paningkamot nga pamilya sa ila nga banwa kag nagbalik dala ang kasikatan nga iya nakab-ot pinaagi sa paningkamot.
Suno kay Phil. Air Force Spokesperson Col. Maynard Mariano, si Lt. Camposano-Beran ang pormal na nga ginhatagan sang sertipikasyon bilang AS-211 combat mission ready pilot kag wingman.
Si Camposano-Beran ang nag-agi sa ginatawag nga fighter fundamentals kag combat crew training sa AS211 nga amu man ang pre-requisite para mangin fighter pilot.
Ang AS211 ang isa ka light combat aircraft sang PAF nga usaron man sa pagpapatrulya sa West PHl Sea.
