KORONADAL CITY -Ginakonsiderar sa subong sang LGU-Bagumbayan sa Sultan Kudarat nga ipaidalom sa state of calamity ang nasambit nga banwa bangud sa damyos nga tuga sang malapnagon nga baha kun sa diin may mga barangay pa sa gihapon nga wala makabalik sa normal ang lebel sang tubig.
Ini ang ginpahayag ni Bagumbayan Mayor Jonalette De Pedro sa interview sang Bombo Radyo Koronadal
Suno sa alkalde, nagalab-ot sa 7 ka barangay ang lubog sa gihapon sa tubig baha kag kinakabalak-an nga magapadayon pa ini sa tion nga magbubo pa ang mabaskog nga ulan.
Dugang pa sini, halos 500 nga mga inddibidwal sa subong ang nagapabilin sa evacuation center sa ila nga banwa.
Pahayag pa sang alkalde, naga-umpisa na suno pa sang sand bagging ang mga residente sa 7 ka mga apektado nga mga barangay para ibutang sa mga river banks agud nga malikawan na ang paglapaw sang tubig baha sa sapa.
Nagapangayo naman ini sang bulig sa national government para sa pagpakay-o sang pila ka mga dike sa ila nga banwa.
