KORONADAL CITY – Nasapwan ang bangkay sang isa ka padre de pamilya nga gin anod sang tubig-baha Domingo sang kaagahun sa sapa nga yara sa parte sang Brgy. San Miguel, Norala South Cotabato makaligad nga tatlo ka adlaw nga pag pangita sini.
Ini ang gin kumpirma sang pulisya nga bangkay ni Manong Prudencio Moreno, 55-anyos nga residente sang Brgy. Puti, Norala, South Cotabato ang nasapwan sa Ala river pasado alas-3 sang hapon kahapon sa Sitio Bilyawan, Brgy. Pinguiaman, Lambayong, Sultan Kudarat.
Sa eksklusibo nga interbyu sang Bombo Radyo Koronadal kay Barangay Kagawad Ibrahem Maulana, ang utod sang mangingisda ang una nga nakakita sa bangkay ni manong Prudencio nga naga lutaw lutaw sa sapa.
Gani gin tawag suno pa sini ang iya nga mga kaupod kag gin buligan nga maka takas halin sa tubig ang bangkay kag gin dala pa ini sa pang pang.
Suno naman kay Kagawad Mateo Datuwal nga isa man nga nag bulig nga makuha ang bangkay ni Manong Prudencio, hinali sang mga ini nga gin report sa Lambayong PNP ang nakakita gani pag abot sang otoridad nga gin kwaan sang laragway kag gin padala sa Norala PNP para sa kumpirmasyon sang pamilya.
Positibo naman suno pa nga gin kilala nga si Manong Prudencio.
Sa subong, gin kuha na sang MDRRMO-Norala agod makit-an sang iya nga pamilya.
Madumduman nga duha sila sang iya nga bata ang gin anod sang tubig baha sadtong Domingo sang kaagahun apang una nga nasapwan ang bangkay sang 14 anyos nga si Divine Grace sadtong Domingo sang gab-i.
