KORONADAL CITY – Emosyonal nga nagpasalamat ang asawa sang isa ka OFW sa UAE sa waragwagan sang Bombo Radyo Koronadal makaligadd nga nabuligan ini nga mapauli ang bangkay sang iya nga bana nga napatay bangud sa Brain Tumor samtang naga ubra sa iban nga pungsod.
Suno kay Maricel Pauya, isa man ka OFW sa pungsod UAE kag tumandok sa Tantangan,South Cotabato, nga wala siya nakahibalo kun ano ang iya nga pagahimoon kun sa diin nagpangayo ini sang bulig bangud sa tuman kadako nga balor ang kinahanglan apang pinaagi sa pagpakig-angot sa waragwagan, hinali man nga naresolbar ang iya nga problema.
Madamo man nga mga NGOs kag LGUs kag ang iya nga nangin abyan sa nasambit nga pungsod ang nakig-angot sa iya agod mabuligan ini sa iya nga problema agod makapuli kaupod ang patay nga lawas sang iya nga bana.
Natalana nga makapuli si Maricel sa palaabuton nga Lunes, Setyembre, 28 2020.
Nagahangyo man ini nga makit-an sang iya nga bata sa ulihi nga tion ang patay nga lawas sang iya nga amay, apang wala ini gintugutan sang LGU sa nasambit nga lugar bangud man sa ginpatuman sa mga health protocols.
Madamo naman ang nagpalab-ot sang ila nga pakigsimpatiya sa ila nga pamilya.
