KORONADAL CITY – Nagalutaw-lutaw kag yara na sa state of decomposition sang masapwan ang bangkay sang isa ka lalaki sa lining canal sa Purok Malipayon, Barangay San Vicente, Sto. Nino, South Cotabato.
Ini ang ginpahayag ni Barangay San Vicente Kagawad Erma Cabayao sa interview sang Bombo Radyo Koronadal.
Suno kay Kagawad Cabayao, nasapwan ang bangkay pasado alas-5 kaina sang hapon kun diin wala ini sang identification rason nga wala pa makilala sang mga otoridad.
Ang description sang bangkay: may kataason nga 5’2, tambukon, naka-brown sang t-shirt, naka-boxer shorts nga itom kag may tattoo sa tuo nga dughan sini.
Sa karon, gindala na sa Emmanuel Puneral Parlor sa banwa sang Sto. Nino ang bangkay sang lalaki.
Kaangot sini, nagapanawagan ang mga otoridad sa sin-u-man nga nadulaan sang himata nga makig-angot sa kapulisan ukon sa barangay officials sang Barangay San Vicente agud makilala ini.
Nagapadayon man ang imbestigasyon sang mga otoridad kun ano ang gintunaan sang kamatayon sang biktima kag ngaa nasapawan ini sa lining canal.
