KORONADAL CITY – Yara na sa decomposition Stage sang masapwan ang isa ka bangkay sang isa ka lalaki pasado alas 9:40 sang aga naligad nga adlaw dira dalanon nga sakop sang Purok Malipayon Brgy. Klinan 6,Polomolok South Cotabato sang tinalikdan nga adlaw.
Ini ang ginkumpirmar ni PLt.Col. Marvin Duadua, hepe sang Polomolok PNP sa interbyu sang Bombo Radyo Koronadal.
Suno kay Col. Duadua, ginreport sang nakakita nga concerned citizen sa ila sini talatapan nga iya natalupangdan ang hinambitan nga bangkay sa kilid sang dalan nga nakagapos ang mga kamot sang Nylon wire subong man nga nakagapos ang mga tiil sang Packaging Tape kag naputos ang ulo sang itom nga panapton kag ginhigtan sang packing tape.
Sa imbestigasyon sang Polomolok PNP,gina alegar nga biktima sang summary execution ang biktima kag ginhaboy lamang sa hinambitan nga lugar.
Suno sa imbestigasyon nga mga 3 na kaadlaw nga patay ang biktima kag yara sa state of decomposition sang makit-an ini sang isa ka concerned citizen.
Sa karon, nagapadayon ang imbestigasyon sang Polomolok PNP sa mga responsable sa pagpatay sa biktima samtang ang hinambitan nga bangkay ang nagapabilin sa paghinakop sang Ariane Funeral Services sa Brgy. Labangal sa siyudad sang Heneral Santos para sa pagpatigayon sang Post Mortem Examination.
