KORONADAL CITY – Nagapadayon ang imbestigasyon sang Columbio PNP sa Sultan Kudarat makaligad masapwan ang bangkay sang isa ka lalaki sa nasambit nga lugar.
Sa ekslusibo nga interbyu sang Bombo Radyo Koronadal kay Columbio Municipal councilor Datu Zahir Mamalinta, ginkilala sini ang mga biktima nga si Mark Galao, yara sa legal nga edad, kag residente sang Barangay New Bantangan sa nasambit nga banwa.
Suno kay Councilor Mamalinta, kabulig ang mga otoridad, narekober ang bangkay sang nasambit nga biktima sa bahin sang Sbang Lam Balkaw, Sittio Lamgawel, Barangay Datalblao kun sa diin puno sang buno ang lawas sini.
Base sa inisyal nga imbestigasyon sang mga otoridad, posible nga gin-usar sang mga suspek ang binangon agud patyon si Galao.
Dako suno pa ang kaakig sang mga ini base sa kadamoon sang mga buno nga naangkon sang biktima.
Personal grudge naman ang ginalantaw nga motibo sang mga otoridad sa krimen.
Ginpasiguro naman ni Councilor Mamalinta nga luwas sa gihapon ang ila banwa sa pihak sang natabo.
