KORONADAL CITY – Nagapadayon ang imbestigasyon sang mga otoridad sa nasapwan nga bangkay sang isa ka lalaki sa higad sang dalan sa bahin sang Barangay Tamnag, Lutayan, Sultan Kudarat alas-6:40 kaina sang aga subong nga adlaw sang Sabado.
Ginkilala ang biktima nga si Rey Manalang, 47-anyos, anay nga security guard, wala sang trabaho kag residente sang La Trinidad, Barangay Zone 1, Koronadal City.
Suno sa Lutayan PNP, nasapwan ang biktima nga duguon kag nakasando lamang sang puti kag naka-shorts sang yellow ang biktima.
Sandig sa imbestigasyon nadula man ang Nmax motorsiklo sini.
Nahibaluan nga nakaangkon sang siyam ka buno sa dughan ang biktima.
Dako man ang pagpati sang kapulisan nga ginhaboy lamang sa nasambit nga area ang bangkay kay wala ini traces sang blood stains.
Sa karon, padayon nga nagapangita sang ebedensiya ang mga otoridad agud matumod kun sin-o ang responsable sa pagpatay sa biktima.
