Padayon ang panawagan sang bulig ni Randy Saguban para sa iya asawa nga si Maylen Saguban, isa ka OFW nga nagaubra sa Riyadh, Saudi Arabia, bangod sa naglala nga kahimtangan sini kag kakulangan sang komunikasyon sa tunga nila.
Sa interview sang Bombo Radyo Koronadal kay Randy, madamo na sang mga tini-on nga nagahatag sang kabalaka sa iya, lakip na ang ginpahayag sang iya asawa nga ginakuha sang iya amo ang iya cellphone, rason nga malawig ang ila indi pag-istoryahanay.
Sa tagsa ka bulan, makaisa ukon makaduha lang sila makakontak sa isa kag isa.
Ginpahayag ni Randy, nga antes nadumduman niya nga nagtawag ang iya asawa kag nagapangayo sang bulig agud makapuli na sa Pilipinas.
Sa ila huli nga video call, nakita niya nga nagahibi ini kag daw nagaantos, apang wala ini sang may ginahambal—isa ka butang nga lalo nagdugang sang iya kabalaka.
Dugang ni Randy, nanugid ang iya asawa sa iya nga ginasakit ini sang iya amo kag ginapabudlayan sang sobra sa iya nga trabaho.
Naobserbahan man niya nga nagpayat gid ini, nga posible nga epekto sang iya kahimtangan didto.
Bangud sini, ginapanawagan ni Randy ang madasig nga bulig halin sa mga ahensya sang gobyerno agud marescue ang iya asawa kag mapauli ini sa Pilipinas nga luwas.
Nagalaum man siya nga mabatian ang iya panawagan kag mahatagan sang nagakaigo nga aksyon ang sitwasyon sang iya asawa sa ulihi nga tion.
