KORONADAL CITY- Ginakabig sa subong nga indi na mahimo pa nga puy-an ang bahin sang Sitio Lamfugon,Brgy.Tinago sa banwa sang Norala South Cotabato bangud dako ang posibilidad nga mangin prone liwat ini sa landslide ukon pagkatibhag sang duta.
Ini ang nangin pahayag ni Ms. Aiza Lim, MDRRMO sang banwa sang Norala sa interview sang Bombo Radyo Koronadal.
Suno sa iya, nagpatigayon sang assessments kag evaulation ang Mines and Geosciences Bureau (MGB) kag naguwa nga delikado katama ang lugar.
Naglab-ot naman sa 92 ka mga pamilya sa subong nagikan sa Sitio Lamfugon,Brgy.Tinago sa banwa sang Norala South Cotabato nga apektado sang landslides sang naglabay nga bulan ang nakabenepisyo sa ginpatukod nga relocation area sang lokal nga gobyerno sang Norala sa diin panibag-o nga puluy-an sang mga na apektuhan sang kalamidad.
Magluwas pa diri, nakapanagtag naman ang LGU-Norala sang bulig sa mga apketado nga pamilya lakip na ang mga materyales nga magamit sang mga ini sa pag patukod sang puluy-an.
Nagapabilin naman nga missing sa gihapon si Florie Sakim, 37 anyos, single kag residente sang nasambit nga lugar makaligad nga natapukan sang duta sa naglabay nga kalamidad.
