Kinumpirma ng state weather bureau na ang dating Low Pressure Area (LPA 04a) ay isa nang ganap na tropical storm habang patuloy itong mino-monitor sa labas ng Philippine Area of Responsibility (PAR).
Sa oras na makapasok ito sa PAR, bibigyan ang bagyo ng pangalang “Caloy.” Huling namataan ang sentro nito sa layong tinatayang 2,800 kilometro silangan ng Northeastern Mindanao, taglay ang lakas ng hanging umaabot sa 55 kph at pagbugsong hanggang 70 kph.
Sa kasalukuyan, hindi inaasahang tatama sa kalupaan ng Pilipinas ang bagyo dahil sa tinatahak nitong pahilagang direksyon. Gayunpaman, posibleng magdulot ito ng mapanganib na kondisyon sa karagatan, partikular sa silangang baybayin ng bansa—na maaaring makaapekto sa mga mangingisda at biyahe ng mga sasakyang pandagat.
Samantala, nananatiling hindi pa direktang naaapektuhan ang malaking bahagi ng bansa. Metro Manila at iba pang lugar ay patuloy na makararanas ng bahagyang maulap hanggang maulap na kalangitan na may kalat-kalat na pag-ulan o pagkulog dulot ng localized thunderstorms.
Pinapayuhan ang publiko na manatiling alerto at sumubaybay sa mga susunod na ulat para sa anumang pagbabago sa galaw at lakas ng bagyo.
