Tigayon na nga nangin super typhoon ang bagyo nga si Carina samtang paguwa sa Philippine Area of Responsibility.
Ang Hangin nga habagat naman ang nagadala sang mga pag-ulan sa pila ka bahin sang pungsod partikular na sa may bahin sang western portion sang Luzon.
Ginpabaskog pa sang Super Typhoon Carina ang habagat nga nagatuga sang malapnagon nga pagbaha sa rehiyon.
Kun indi magbag-o ang hulag sang bagyo, posible ini nga maguwa sa teritoryo sang pungsod karon sa kaagahon ukon buwas sa aga.
Sandig sa kasamtangan nga datos sang Bombo Weather Center, ulihi nga naobserbahan ang Centro sang super typhoon Carina sa kalayuon nga 380 km North sang Itbayat, Batanes.
Ginaangkon sini ang kabaskog sang hangin nga nagalab-ot sa 185 km/h malapit sa tunga kag may pagbugso nga 230 km/h.
Mahinay sa gihapon ang paghulag ni Carina pa nakatundan-nabagatnan sa kadasigon nga 20 km/h.
Sa subong, nagapabilin ang siganl No. 2 sa probinsiya sang Batanes.
Bangud sini, lauman ang mabaskog nga pag-igo sang hangin nga may pagpamahog sa palangabuhian.
Ginpasaka man ang signal no. 1 sa Babuyan Islands, the northern portion of mainland Cagayan kag the northern portion of Ilocos Norte
Ginalauman naman nga maga-landfall ang Carina sa nakatundan nga bahin sang Taiwan subong nga gab-i.
Sa track forecast, magaagi ang super typhoon sa kadutaan sang Taiwan kag magaguwa sa Philippine Area of Responsibility (PAR) buwas (25 July) sa aga.
Ginlaygayan man ang tanan nga maghalong labi na sa mga lugar nga prone sa baha kag landslide.
