KORONADAL CITY – Ginakabalak-an nga isa ka bag-o tukod nga local terror group ang yara sa likod sang panibag-o nga pagpasigabong sang Improvised Explosive Device sa Carlitos restaurant sa Kalawag II Isulan, Sultan Kudarat.
Sa interbyu sang Bombo Radyo Koronadal kay alyas Gem, bata sang nagapanag-iya sang nasambit nga restaurant, ginsaysay sini ang mga nabaton nila nga pamahog halin sa isa ka nagpakilala nga miyembro sang Al Erhab Group.
Nahibaluan nga ang nasambit nga grupo ang bag-o sa pamatian sang mga otoridad kun sa diin suno kay 6th Infantry Division Philippine Army Spokesman Major Arvin Encinas padayon ang ila pakig-angot sa tag-iya sang restaurant, lokal nga gobyerno sang Isulan kag PNP.
Sa karun uyat na sang mga otoridad ang CCTV footage sang nasambit nga IED explosion kun sa diin ginasiling nga nakita sa CCTV camera ang isa ka lalaki nga nagbilin suno pa sang bomba.
Kaangot sini yara na sa estable nga kondisyon ang 18 nga mga biktima sang bombing nga naka confine sa mga nagkalain-lain nga balay bululngan.
