KORONADAL CITY – Ginaistoryahan subong sa probinsiya sang South Cotabato ang isa ka bag-o bun-ag nga lapsag nga ginbilin sang wala pa makilal-an nga iloy sa likod sang pick up sang mag-asawa nga taga banwa sang Banga.
Sa interbyu sang Bombo Radyo Koronadal kay Ginang Venus Montano, Municipal Social Welfare Officer sang Banga, South Cotabato, isa ka mapagros nga baby girl ang nasambit nga lapsag nga ginbilin sang iya kaugalingon nga iloy.
Suno kay Montano, nakita na lamang sang wala ginhingadlan nga mag-asawa ang lapsag sa likod sang ila nga salakyan sang nag-abot sa ila nga balay gikan sa masobra 30 minutos nga biyahe gikan sa siyudad sang Koronadal.
Nakibot daw ang mga ini kag wala ginalauman nga may lapsag nga ginbutang sa ila salakyan kag may nakakabit pa nga pusod.
Bangud sa kabalaka nga mabutang sa delikado ang kondisyon snag bata, gindala sang mag-asawa ang lapsag sa health center agud nga mahatagan sang first aid.
Ang nasambit nga mag-asawa man ang nagbakal sang gatas kag beberon sang bata kag temporaryo nga gin-atipan makaligad nga wala sang bakante sa lying in sang ila nga banwa.
Apang, suno kay Montano, kinahanglan sa gihapon nga iturn-over ang lapsag sa DSWD.
Nagpatigayon naman sang imbestigasyon ang kapulisan agud nga makilala ang iloy sini.
Samtang, nagbubo naman ang mga nagkainteres nga adoptaron ang nasambit nga baby girl.
