Ginpabugal sang Land Transportation Office (LTO) nga natapos na nila ang backlog sang tanan nga mga plaka sang salakyan halin pa sang 2014 tubtob 2023.
Suno kay LTO Executive Director Atty. Greg Pua, sa una nga tuig ni Presidente Ferdinand Marcos Jr., may ara na sila sang kapin 12 milyon ka plaka nga naipaguwa.
Ginklaro man niya nga may igo sila nga suplay sang plaka kag yara na sila subong sa proseso sang distribusyon.
Isa sa mga rason sang ila kadalag-an amo ang paghatag sang igo nga budget agud madoble ang ila produksyon kag matapos ang mga pending nga plaka.
Agud masiguro nga makaabot ang plaka sa tagsa ka salakyan, naglunsar ang LTO sang programa nga “Stop, Plate and Go,” kun sa diin ginapara ang mga motorsiklo, ginaverify ang ila datos, kag ginahatagan sang husto nga plaka.
Pwede man nga mat-check sang mga motorista ang ila plaka paagi sa LTO Tracker nga makita sa eGov App.
Target sang LTO nga maipanghatag ang kapin 7.5 milyon nga plaka antes mag Oktubre 31, 2025.
