KORONADAL CITY- Nagapadayon ang imbestigasyon sang Koronadal City PNP sa nagluntad nga pagpangluthang patay sa ginapatihan nga riding in tandem sa isa ka babayi nga empleyado sang KCC mall sa syudad sang Koronadal.
Sa interbyu sang Bombo Radyo Koronadal sa Koronadal City PNP ang biktima amuh si Jennelyn Gansing, 21 anyos kag residente sang Brgy. Desawo T’boli South Cotabato apang kasamtangan nga naga istar sa iya boarding house sa Upper Osmeña st. Koronadal City.
Nahibaluan nga naghalin suno pa ini sa iya nga duty kun sa diin pag abot sa iya nga boarding house ginluthang ini sang riding in tandem nga nakasakay sa duag itom nga motorsiklo usar ang cal. 45 nga armas luthang sang Disyembre 11, 2017.
Nakaangkon ang biktima sang 2 ka igo sang bala sa atubang sang iya nga lawas kag sa banda nga likod sini nga nagresulta sa gilayon nga kamatayon sang biktima.
Sa subong nagapadayon pa ang imbestigasyon sa motibo sang nasambit nga krimen.
Nahibaluan nga isa ka rape victim si Jennelyn kun diin napasakaan naman sang kaso kag napreso ang suspek sa pagpanglugos sa iya nga suno pa bata sang isa ka retirado nga pulis.
