KORONADAL CITY – Wala na ginpasakaan sang kaso sang nagapanag-iya sang Laforteza pharmacy sa Gensan Drive, Lower Aurora St., Barangay Zone 1, Koronadal City ang isa ka babaye nga nagpanghold-up Miyerkules sang hapon, Agosto 28, 2024.
Ini matapos nga natukiban nga nagasuprer sang “postpartum syndrome” ang suspek nga bulan pa lamang nakabun-ag kag may lapsag.
Ginkilala ang babaye nga si Alyas Inday, may bana kag bata nga residente man sang siyudad sang Koronadal.
Sandig sa report sang Koronadal City PNP, nagsulod sa pharmacy ang babaye kag nagpakuno-kuno nga customer kag sang nakapalapit sa cashier nagbunot ini sang kutsilyo kag nagdeklarar sang hold-up.
Ginpabuksan sini ang kaha kag ginkuha ang kwarta apang lunsay mga coins lamang ang nakuha sini bangud nakalock ang isa pa ka kaha kun diin nakabutang ang dako nga kantidad sang kwarta.
Gilayon man nga nagpalagyo ang suspek padulong sa roundball sang siyudad apang pagkaligad sang pila ka oras sa bulig sang CCTV footage nakilala ini kag nadakpan.
Gilayon ini nga gindala sa police station kag ginpaidalom sa interogasyon.
Didto ginpahayag sang suspek nga nahimo sini ang pagpang-hold-up agud may ibakal sang gatas sa lapsag sini.
Sa baylo nga magpasaka sang kaso naluoy ang tag-iya sang pharmacy kag ginpatawad na ini apang ginpaandaman nga indi na paghimuon pa liwat.
