Ginpaguwa sa eroplano ang isa ka babaye sa China matapos ini nga magtuga sang inoras nga delay bangud sa iya pagpamalibad nga ibutang ang iya nga luxury handbag sa idalom sang iya nga pulungkuan.
Sandig sa report sang South China Morning Post (SCMP), isa ka pasahero sang eroplano ang nag-post sang video sang insidente sa social media platform nga Douyin kon sa diin nakaangkon ini sang masobra 4 million views kag nanuhaytuhay nga komento halin sa mga netizen.
Suno sa nag-upload sang video, ang babaye nga yara sa economy class ang nag-insister nga indi pag-ibutang ang iya Louis Vuitton nga bag sa idalom sang bangko nga yara sa iya una kag sa baylo, itupad nalang niya ini.
Nahibaluan nga gina-require ang mga plane passengers nga ibutang sa idalom sang ila bangko ang ila mga bag agud nga kon may matabo nga turbulence, indi magtalabog ang mga ini nga mahimo maka-igo pa sa iban nga pasahero ukon magpamalabag sa mga escape route.
Bangud sini, gin-escortan sang mga police ang babaye panaog sa eroplano bangud sang perwisyo nga iya gindulot nga nangin rason para maisol man ang oras sang mga kasunod nga flights.
Sandig sa report, ang bag sang babaye ang nagabalor sang $3,000 ukon P171,000, samtang ang iya ticket sa nasambit nga flight ang nagabalor sang $110 ukon P6,200.
Suno sa SCMP, nagpamalibad nga maghatag sang statement ang airline kag wala man ginhingadlan ang babaye.
