KORONADAL CITY – Nagapadayon ang imbestigasyon sang mga otoridad angot sa pagpamusil-patay sa isa ka purok official sa Purok 3 Kalyong, Brgy. Landan, Polomolok, South Cotabato pasado 1:35 ng hapon sini sang Biyernes, Setyembre 13, 2024.
Ginkilala ni Polomolok PNP chief of police Lt. Col. Peter Pinalgan Jr. ang biktima nga si Marebel Manton, 46 anyos, lalaki, mangunguma kag residente sa nasambit nga lugar.
Suno kay Pinalgan nagatambay sa terrace sang ila balay ang biktima kaupod ang iya utod kag hinablos sang hinali nag-abot ang suspek nga mismo pakaisa sang biktima nga si Ariel Manton, yara sa legal nga edad, tricycle driver kag residente sang nasambit nga barangay.
Gilayon nga ginluthang sang suspek sa likod ang biktima nga naigo sa ulo sini.
Matapos ang krimen nga nahimo, gilayon man nga nagpalagyo ang suspek wala mahibaluan nga direksiyon.
Gindala pa sa hospital si Marebel apang gin deklarar ini nga dead on arrival sang doktor.
Away pamilya ang motibo nga nakita sang kapulisan sa nagluntad nga pagpamusil.
Sa karon, yara na sa kustodiya sang kapulisan ang suspek matapos nga madakpan sa ginpatigayon nga follow-up operation.
Natalana naman nga pasakaan sang nagakaigo nga kaso sang Polomolok MPS ang suspek.
