KORONADAL CITY – Ginpakilala sang isa ka highschool teacher ang isa ka pinasahi nga machine nga makabulig suno pa sa pagpanubo sang kaso sang coronavirus nga ginbansangan nga covid-19 disinfecting misting machine (DMM).
Suno sa inventor sini nga si Engr. Louie Joy Palete sa interbyu sang Bombo Radyo Koronadal, tinutuyo sini nga ma-disinfect ang isa ka indibidwal pinaagi sa otomatiko nga pag-spray sa pagtindog lamang sa atubang sini.
Nagadugay ang pag-spray sang nasambit nga device sa sulod sang 2.5 segundo.
Dugang ni Palete, nga kapin tanan nga mga components sini ang halin lamang sa mga simple nga butang kasubong sang water jug, gripo, kag tubo.
Samtang magahalin naman ang mga primary components sini kasubong sang sensor halin sa Manila kun sa diin nagabalor ang mga ini sang P4,000 kada isa.
Sa subong ginbutang na ini sa kada checkpoint sa siyudad sang Koronadal kun sa diin makabenepisyo diri ang mga motorista nga nagaagi sa mga checkpoints.
Bukas naman sa nagkalain-lain nga donasyon si Palete agud makahimo sang mas madamo pa nga misting machines nga magamit sa bilog nga probinsiya sang South Cotabato.
