ISULAN, SULTAN KUDARAT – Ginlaragway nga kasubong sa isa ka ghost town ang banwa sang Isulan, Sultan Kudarat makaligad ang nagluntad nga panibag-o nga pagpasigabong sang Improvised Explosive Device partikular na sa merkado publiko sang nasambit nga banwa sa Brgy. Kalawag III, Isulan Sultan Kudarat.
Sa ekslusibo nga interbyu sang Bombo Radyo Koronadal kay Gng. Juliet Cauba nga isa ka market vendor kag survivor sa nasambit nga pagpasigabong, nagakahadlok suno pa sila nga magbaligya sa merkado publiko bangud sa posibilidad nga pag atake sang mga grupo nga nagapatigayon sang mga pagpamomba.
Samtang suno naman kay Bombo Correspondent Larry Geronio nga may negosyo man sa sulod sang Isulan public market sigurado nga maapektuhan suno pa ang dalagan sang negosyo sa lugar bangud sa mga bayolente nga mga aktibidad sang mga lawless elements.
Kaangot sini malain naman ang buot sang pila ka mga residente kag ginapamangkot ang mga otoridad kun paani nakalusot ang ma suspek sa likod sini bangud naka stand-by man ang tangke de giyera sang militar malapit sa blast kag may mga presensiya man suno pa sang mga pulis kag yara pa sa idalom sang martial law ang bug-os nga isla sang Mindanao.
