KORONADAL CITY – Ginakaalarma subong ang asud-asod nga pagpang-atake sang ginapatihan nga riding-in-tandem sa syudad sang Koronadal makaligad patay naman sa pagpangluthang ang isa ka lalaki nga ginluthang patay sa bahin sang Corner Arellano Antipolo St. sa sini nga syudad pasado alas 9 sang aga subong nga adlaw.
Sa eklusibo nga interbyu sang Bombo Radyo Koronadal kay Amy Zapata tiya sang biktima ginkilala sini ang iya hinablos nga ginluthang patay nga si Randy Salanga Muega, habal-habal driver yara sa legal nga edad kag residente sang Bo. 4 syudad sang Koronadal.
Sa inisyal nga imbestigasyon sakay ang biktima sang iya bajaj motorcycle nga duag black kag may yara sang plate no. nga XZ 2317 kun sa diin pag abot sa area gintiro ini sang wala pa matumod nga mga suspek.
Nag-angkon ini sang 4 ka igo sang bala sa nagkalain lain nga bahin sang iya lawas nga gintunaan sang gilayon sini nga kamatayon.
Wala naman sang nahibaluan ang iya pamilya nga nakaaway sang biktima gani blangko sa gihapon kun ano ang motibo sa pagpatay kay Randy Salanga Muega.
Madumduman kahapon nga adlaw, ginluthang patay man ang isa ka traysikel driver sa Brgy. Zone 3 syudad sang Koronadal sang ginapatihan man nga riding in tandem.
