Ginpaathag sang Anti-Red Tape Authority (ARTA) nga ginpasakaan nila sang kaso sa Office of the Ombudsman ang 117 ka local government units (LGUs) bangud sa gin-alegar nga wala pagpatuman sang electronic Business One-Stop Shop (eBOSS).
Suno kay Ernesto Perez, may masunod pa nga mga kaso batok sa iban nga non-compliant nga LGUs matapos ang ila inspeksyon, apang wala anay siya nagdetalye kun may lakip nga LGU sa National Capital Region.
Ginaimbestigaran man sang ARTA ang 11 ka LGUs nga gin-alegar naglapas sa Executive Order No. 41 bangud sa padayon nga pagpanukot sang pass-through fees sa national roads.
Madumduman man nga ginpasang-atan sang reklamo nga grave misconduct ang alkalde sang Meycauayan City kag ginapangayo ang iya preventive suspension.
Samtang ginpabaskog ang kampanya batok sa mga wala nagasunod, ginpasidunggan man sang ARTA ang mga LGUs nga nagasunod sa regulasyon kag ginpasiguro ang padayon nga training sa paggamit sang digital tools para sa mas episyente nga serbisyo publiko.
