KORONADAL CITY- Nagapadayon ang pagpangita sang militar sa armado nga mga kalalakihan nga nagpalupok sang ila mga armas samtang nagapatrolya ang mga katapo sang 7IB Philippine Army kag Kabacan PNP sa Sitio Lumayong, Brgy. Kayaga, Kabacan, North Cotabato.
Sa impormasyon halin sa militar, nagapatigayon sila sang pagpatrolya sa nasambit nga lugar sang gulpi na lamang nakabati ang mga ini sang asud-asod nga lupok sang armas luthang.
Gilayon naman nga nagdaralagan ang armado nga kalalakihan sang ginresponderan sang mga otoridad sa mga puluy-an nga ginapanaguan sang mga ini.
Wala na maabtan ang mga armado apang narekober naman ang mga armas nga ginalakipan sang 1- M16A1 rifle, 1- M653 carbine, 1- M1 garand, 1- M14 rifle, mga magazines kag bala.
Yara naman sa paghinakop sang Kabacan PNP ang mga armas luthang samtang padayon nga ginalagas ang mga armado.
