KORONADAL CITY – Naglab ot sa 228 ang kabug usan nga apektado nga mga pamilya sa natabo nga buhawi kag pagbaha dala sang malain nga panahon sa Norala, South Cotabato.
Ini ang ginkumpirma ni Mayor Clemente Fedoc, sang Norala South Cotabato sa interbyu sang Bombo Radyo Koronadal.
Suno sa iya, ang mga apektado ang ginakalakipan sang Barnagy Simsiman nga kung sa diin 100 ang pamilya nga apektado kag 8 nga totally damaged nga mga panimalay, 87 sa Barangay Matapol nga may apat ka totally damaged, 39 sa Barangay San Jose kag apat naman sa Liberty.
Ginpahayag sang alkalde, nga ila ginahimo ang tanan agud nga mahatagan sang nagakaigo nga bulig ang mga apektado, ilabi na ang mga nadulaan gid sang panimalay nga sa karon kasamtangan naga istar ang mga ini sa ila ginhimo nga temporary sites samtang ang iban naman ang naga istar sa ila nga mga himata sa kaipi nga lugar.
Samtang sa pihak nga bahin nagdeklara man sang suspension of classes sa tanan nga level ang alkalde bangud sa padayon nga naeksperyensyahan nga pag-ulan-ulan sa lugar sa pihak nga padayon man ila nga monitoring para sa kaluwasan sang mga pumuluyo kadungan sang nagapadayon nga malain nga panahon.
