KORONADAL CITY- Yara na sa kustodiya sa karon sang mga otoridad ang aoat suno pa nga mga gun for hire nga plano nga patyon ang mag-amay nga kandidato sa Banga, South Cotabato.
Sa interbyu sang Bombo Radyo Koronadal kay Mr. Bingo Reyes, nagapapili nga pagka-boardmember sang segundo Distrito sang South Cotabato, siya kag ang iya nga bata sini nga si Barangay Kapitan Janeem Reyes, ABC President sang Banag kag kandidato man sa pagka konsehal ang punterya sang mga gin aresto nga suspek.
Ginkilala ka mga suspek nga amo sanday Jayson Gamay-on, yara sa legal nga edad kag residente sang Barangay Sta. Cruz, Koronadal City kag gina alegar nga prime suspek, alyas Joshua, anay nga CAFGU kag taga Tarlac, lakip man ang mag nubyuhanay nga sanday Beverlyn kag Caloy.
Samtang nakapalagyo naman ang isa pa ka mga upod sini nga ginapatihan nga ila naman nga driver samtang dala nila ang ila nga mga armas.
Sa panaysayon ni Reyes, ginbuyag-yag sang isa sa mga naaresto nga isa ka bulan na sila nga sinusurveilance sang mga ini kag nagapangita lamang sng tiempo agud nga patyon ang mag-amay.
Yara suno pa sa P20,000 ang bayad sa tagsa ka mga ulo sang mag-amay nga Reyes, suno sa gihapon sa panaysayon sang isa sa mga gin aresto.
Dako naman ang pagpati ni Reyes nga bangud sa politika amo nga plano sila nga patyon sang iya nga bata kung sa diin ginbulgar pa sini kung sin o ang nagsugo sa mga suspek.
Apang nagapanginwala naman ang iban pa nga gin aresto sa mga akusasyon batok sa ila.
Kasamtangan naman sila nga ginpaidalom sa iterogasyon sa Banga Municipal Police Station.
