Naglab-ot sa apat ang pilason samtang masobra 20 naman ang naaresto sa nagluntad nga engwentro sa tunga sang militar kag mga armado nga kalalakihan sa Barangay Bagolibas, Aleosan, North Cotabato, alas-4:00 sang hapon, Oktubre 24, 2024.
Suno kay Lt. Col. Edgardo Batinay, pinuno sang 34IB, nakabaton sila sang impormasyon angot sa mga armado nga kalalakihan sakay sang duha ka multicab, isa ka pick-up, kag tatlo ka motorsiklo.
Ginapamunuan suno pa ang mga ini nanday alyas Montasser kag Nasser nga mgapadulong kuntani sa Sitio Tubak, Barangay Pagangan sang nasambit nga banwa.
Gilayon naman nga naglunsar sang operasyon ang tropa sang 34IB nga nagresulta naman sa masobra isa ka oras nga engkwentro.
Sa nasambit nga engkwentro, tatlo sa mga lawless elements ang napilasan kag isa naman sa bahin sang mga suldado.
Naaresto sang militar ang 21 ka tawo nga katapu sang lawless elements kun diin narekober man sa mga ini ang pito ka matag-as nga kalibre sang armas luthang lakip na ang lima ka M16 rifles kag duha ka M14 rifles.
Nakuha man sa mga ini ang isa ka granada, pito ka bandolier, mga bala, magasin, kag mga salakyan nga gingamit sang mga suspek.
Sa karon, ginahibalo pa ang mga kaso nga posible nga ginainvolbaran sang mga armado nga kalalakihan.
