KORONADAL CITY – Napasakaan na sang nagakaigo nga kaso ang apat ka mga armado nga nadakpan sa ginpatigayon nga synchronized checkpoint sang mga otoridad kadungan sang selebrasyon sang T’nalak festival sa bahin sang PCP 1, Barangay Namnama, Koronadal City sang nagligad nga adlaw.
Ini ang ginkumpirmar ni PLt.Col. Hoover Antonio, chief of police sang Koronadal City PNP sa interview sang Bombo Radyo Koronadal.
Suno kay Antonio, ginahulat na lamang nila ang mangin resolution sang fiscal office sa ginpasaka nga complaint batuk kanday Dante Mamalinta Mangudadatu, 54-anyos, may asawa kag residente sang Barangay Mayo, Columbio, Sultan Kudarat; Johamidin Kamid Minandang, 30-anyos ; Allan Ayob Bansulat, 29-anyos, nga lunsay mga residente sang residente sang Barangay Elbebe, Columbio, Sultan Kudarat kag isa ka Freddie Salla Lanao, 29-anyos nga residente sang Barangay Polomolok, Columbio, Sultan Kudarat.
Sang ginpaidalom sa interogasyon ang mga suspek, ginpahayag sang mga ini nga nagbitbit sila sang mga armas para sa ila nga seguridad.
Nagpadulong suno pa sila sa South Cotabato agud lamang nga magbakal.
Madumduman nga gin-flagged down sang mga otoridad ang salakyan sang mga ini nga Toyota Fortuner nga puti nga may plate number AAM 2675 kun diin nakit-an ang mga matag-as nga kalibre sang armas nga ginalakipan sang mga masunod: 1unit sang Bushmaster M16 rifle; 1 unit sang HK 416 D M16 rifle;1 unit sang Colt caliber 45; 1 unit sang Armscor 45 caliber; 1 unit sang SAM shooters; 1 unit sang caliber 45 with CN 122133; 10 magazines sang 45 caliber; 17 magazines sang M16 rifle; 500 cartridge cases sang 5.56mm; 75 cartridge cases sang caliber 45; 2 bandoliers; 1 pc beltbag; 2 ka sling bags kag mga cellular phones.
Sa karon, nagapadayon ang pagpahanumdom sang kapulisan nga ginadumilian ang pagdala sang mga illegal nga armas ilabi na nga hugot nga seguridad man ang ginapatuman sa siyudad sang Koronadal kadungan sang kafiestahan.
Sa pihak sini, ginpasiguro man ni Antonio nga matawhay kag wala sang problema ang pila ka adlaw na nga mga aktibidades kaangot sa selebrasyon sang Tnalak kag founding anniversary sang probinsiya.
