KORONADAL CITY– Yara na sa kustodiya subong sang Philippine Drug Enforcement Agency-Bangsamoro Autonomous Region in Muslim Mindanao ukon (PDEA-BARMM) ang anim ka indibidwal matapos nga nadakpan sa ginpatigayon nga buy-bust operation sa Barangay Rosary Heights 7 sa syudad sang Cotabato.
Suno sa PDEA BARMM, ginpatigayon ang nasambit nga buy-bust operation sang gintingob nga pwersa sang Army’s 5th Special Forces Battalion, Philippine Drug Enforcement Agency kag Cotabato City police office.
Nahibaluan nga target sang nasambit nga operasyon si Michael Mohammad ukon alyas Teng tag iya sang drug den kaupod sanday Faisal Mohammad, Silogan Patadon, Benjie Ulobalang, Sherad Abedin kag Amer Abedin nga ginasiling nga kliyente suno pa ni Mohammad.
Narekober naman sang mga otoridad sa nasambit nga drug den ang walo ka pakete sang ginapatihan nga shabu ,shabu paraphernalia, P10,000 nga marked money , mobile phones kag identification cards sang mga naarestar.
Kaso nga paglapas sa Republic Act 9165 (Dangerous Drugs Actof 2002 ang pangatubangon sang mga suspek.
