KORONADAL CITY – Nagapadayon sa subong ang imbestigasyon sang mga otoridad sa gintunaan sang kamatayon sang isa ka lalaki nga nasapwan nga patay kag yara na sa state of decomposition sa Brgy. Udtong, Lambayong, Sultan Kudarat kahapon December 3 2024.
Sa interview sang Bombo Radyo Koronadal kay Barangay Kapitan Danilo Simtim, ginkilala ang biktima nga si John Vincent Sabado, 26-anyos, soltero kag residente sang Barangay San Jose, Koronadal City.
Suno kay Barangay Kapitan Simtim, anay nga napreso ini matapos mainvolbar sa illegal nga droga apang nakaguwa naman sa presuhan.
Dugang pa sang opisyal, ginkumpirmar sang pamilya sini nga si John Vincent ang nasapwan nga patay bangud sa mga palatandaan sini sa lawas sang biktima.
Nahibaluan nga nagbiya ini sa ila panimalay sang Domingo nga adlaw, Disyembre 1, 2024 agud magpadulong sa Lambayong apang wala na nakabalik kag nasapwan na lamang nga wala na sang kabuhi.
Naguwa naman sang imbestigasyon sang mga otoridad nga may igo sang bala sa parte sang ulo ang biktima nga posible nga tunaan sang kamatayon sini.
Sa karon, nagapabilin ang bangkay sa isa ka punerarya sa siyudad sang Tacurong kag natalana nga ipaidalom sa autopsy.
Samtang, ginahibalo pa sang mga otoridad ang motibo sa pagpatay sa biktima kag kun sin-o ang responsable sa krimen.
