KORONADAL CITY- Patay ang isa ka anay OFW, samtang pilason naman ang isa pa sa pinakabag-o nga pagpangluthang nga nagluntad takna alas-7 kagab-i, sa bahin sa Purok Masipag, Barangay Santa Cruz, Koronadal City.
Ini ang ginkumpirmar ni Barangay Kapitan, Nimfa Tumilap sa interview sang Bombo Radyo Koronadal.
Ginkilala sini ang biktima nga si Cherry Pascual, 40 anyos, single kag residente sang amu nga lugar.
Sandig sa impormasyon nga ginpaabot sang opisyal, papuli na kuntani ang biktima kag ang isa pa kaupdanan sini sakay sang isa ka motor halin sa pagbakal sang feeds sang hinali na lamang suno pa ginluthang ang mga ini sang wala pa makilal-an nga suspek usar ang wala pa mahibaluan nga kalibre sang armasluthang.
Bangud sa naangkon nga igo sang bala sa iya nga lawas, nautasan sang kabuhi ang biktima samtang na-igo naman sa bahin sang hita ang driver sang ila nga motor nga ginasakyan.
Madasig naman suno pa nag palagyo ang suspek padulong sa wala pa mahibaluan nga direksyon.
Dugang pa sang Kapitana, wala man sang may nakontra ang biktima kag isa ka maboot nga persona.
Naga pangayo naman ini sang kooperasyon kag pag-ugyon sa tanan nga nakakita sang krimen para sa madasig nga pag tumod sang motibo kag mga suspek sa nasambit nga pagpangluthang patay samtang naga padayon naman ang imbestigasyon sa nasambit nga krimen.
