KORONADAL CITY – Suportado kag gindayaw sang anay tiglikom sang Department Of Interior and Local Government (DILG) ang pagpili ni incoming President Bong Bong Marcos Jr kay anay Metropolitan Manila Development Authority (MMDA) Chairt Benhur Abalos bilang madason nga DILG Secretary.
Ini ang nangin reaksiyon ni Mr. Mike Sueno, former DILG Secretary sa interview sang Bombo Radyo Koronadal.
Suno kay Sueno, “good choice ukon maayo” ang pagpili sang administrasyon ni BBM kay Abalos bangud sa eksperiensiya sini kun diin nangin isa man anay ini ka alkalde kag mahimo niya nga ma-usar ang iya nga mga abilidad sa pagdumala sa ahensiya.
Nagapati man si Sueno nga mangin epektibo nga pagpatuman sang mga pagsulundan nga igaimplementar sini sa DILG.
Madumduman nga si Benhur Abalos ang ginpili ni President-elect BBM kag ginbaton man sini rason nga siya ang magatal-os kay outgoing nga DILG Secretary nga si Eduardo Año.
Dugang pa sang anay nga opisyal, maayo man ang set sang cabinet officials nga ginpili ni BBM bangud sa mga eksperyensiya sang mga ini kag ang background sa diin ginalauman nga makabulig sa ikaayo sang pungsod sa pagsulod sang Marcos Administration.
