Ginsentensiyahan sang kamatayon ang anay Agricultural Minister sang China nga si Tang Renjian tungod sa krimen nga may kaangtanan sa korapsyon.
Base sa desisyon sang People’s Court of Changchun sa northeast Jilin province, ginpahayag sang korte nga nakabaton si Tang sang suhol nga kwarta kag mga propiedad nga nagabalor sang masobra sa 268 million yuan ukon $38 million halin sang 2007 tubtob 2024.
Suno sa korte, ang iya pagbaton sang suhol nagresulta sang “severe losses” sa interes sang estado kag sa mga pumuluyo, gani ginpasiguro sini ang parusa nga kamatayon.
Gin-kumpirmar man ni Tang ang iya krimen kag nagpahayag sang paghinulsol.
Ang pag-sentensiya kay Tang amo ang pinakabag-o sa seryoso nga kampanya ni Chinese President Xi Jinping batok sa korapsyon kag mga anomalya sa gobyerno, nga nagresulta sa pagkahulog sang madamo nga matataas nga opisyal sa gobyerno.
