KORONADAL CITY – May salabton man suno pa ang anay administrasyon bangud sa ginhimo nga pagpabaya rason nga naglala ang social conflict sa siyudad sang Marawi nga nagresulta sa pag-atake sang Maute terror group.
Ini ang gin-insister ni Bayan Muna Rep. Isagani Zarate sa interbyu sang Bombo Radyo Koronadal.
Suno kay Zarate, ang natabo nga rebelyon sa Marawi City nga nakig-alyansa sa ISIS terrorist ang konektado sa wala pa matuldukan nga historical conflict nga ginpalala pa sang pagpamulitika kag kalakaran sang iligal nga droga.
Bangud sini, dapat suno pa nga mapatigayon ang mas madalom nga imbestigasyon sa natabo sa Marawi kag indi lamang makuntento sa pag-arestar sang mga katapu sang Maute, mga protector sini kag tanan nga ginanagot sa nasambit nga grupo kaupod na ang mga ginpahayag foreign terrorists.
Dugang pa ni Zarate, makaluluoy ang sitwasyon sang mga evacuees sa lugar nga apektado sang kinagamo base sa nakita sini.
Kadungan sini, nagpanawagan pa ang opisyal sang dugang nga bulig labi na nga kinahanglan sang mga biktima ang pagkaon, panapton kag malimpyo nga tubig agud malikawan nila nga makaangkon sang balatian.
Nahibaluan nga nagbisita sa siyudad sang Marawi si Zarate kag iban pa nga opisyal kun diin nagbulig ang mga ini sa ginpatigayon nga medical mission, pyschosocial intervention kag iban pa.
