KORONADAL CITY- Nagserbi nga inspirasyon sang isa sa mga Top 12 finalist sang Bombo Music Festival 2019 sa paghimo sang iya manami nga komposisyon sang ambahanon ang eksperyensya sang mga pigado nga mga pumuluyo nga yara sa isa ospital sa Legazpi City.
Sa ekslusibo nga interbyu sang Bombo Radyo Koronadal kay Eugenio Corpus III, sang Bañaderos st. Legazpi City, masami suno pa ini nga nagatambay sa isa ka ospital kun sa diin naga-obra ang iya nga tiya. Ginakadlawan lang suno pa ang nasambit nga ospital bangud magasulod nga naka-ambulansya ang pasyente kag magwa sa punerarya.
Dugang pa sini nga mismo sa garden sang ospital niya ginhimo ang ambahon kag ang guya sang mga pasyente nga na-confine didto kag ang sitwasyon sang ospital ang nagserbi nga inspirasyon sini.
Tuman man ang kalipay ini nga malakip ang iya komposisyon sa madamo nga entries halin sa nagkalain-lain nga bahin sang pungsod.
Ang Bombo Music Festival 2019 ang isa ka dako nga oportunidad sa iya ilabi na kag ang mapakigbahin sini ang iya nga talento.
