KORONADAL CITY – Nagapadayon ang imbestigasyon sang mga otoridad sa nagluntad nga pagpangluthang sa tatlo ka mga sibilyan lakip na ang mag amay sa banwa sang Sultan Mastura, Maguindanao nga nagresulta sa kamatayon sang isa kag pagkapilas sang duha.
Ginkilala sang Sultan Mastura PNP ang napatay nga si Satar Misawid samtang pilason naman ang bata sini kag hinablos nga lunsay mga menor de edad kag residente sang Barangay Tariken sa nasambit nga banwa.
Suno sa mga otoridad, ginamaneho ni Misawid ang iya motorsiklo papuli sakay ang bata kag hinablos sini sang ginbalabagan sang wala pa natumod nga mga suspek kah ginpangluthang.
Nag-angkon naman sang madamo nga igo sang bala sa nagkalain-lain nga bahin sang lawas si Misawid nga nangin tunaan sang gilayon sini nga kamatayon samtang padayon naman nga ginabulong ang bata kag hinablos sini.
Na-rekober naman sang PNP sa crime scene ang pila ka basyo sang bala halin sa cal. 45 nga armas.
Sa karun blangko pa ang mga otoridad sa motibo sang krimen.
