KORONADAL CITY – Ginsungka mismo sang isa ka amay ang iya 2 ka mga bata nga mga myembro sang komunista kag rebelde nga grupo nga New People’s Army o NPA sa syudad sang Tacurong.
Suno sa 1st Mechanized Infantry Brigade, ang mga rebelde nga ginturnover sa ila ang ginkilala nga sanday Boyet Gomez Ador, 19 anyos, Ato Gomez Ador, 18 anyos nga ginsungka mismo sang ila amay nga si Jun Ador, 48 anyos nga ginasiling nga anay NPA commander sa nabukid nga bahin sang Sultan Kudarat.
Suno sa mag-utod, mismo ang amay na nila ang nag ganyat sa ila nga ibilin na ang komunista nga grupo.
Kadungan sang ila pagsungka, naturnover man nsa militar ang 40mm Grenade Launcher kag isa ka locally manufactured Cal 5.56mm Rifle.
Makaligad ang pagsungka sang mga rebelde, makabaton ang mga ini sang bulig halin sa gobyerno.
Kaangot sini, gin-awhag naman ni 6th Infantry Division commander, Brig. Gen Cirilito E. Sobejana, ang nabilin nga mga rebelde nga myembro sang Guerrilla Front 73 sa Sultan Kudarat nga malinong nga magsungka na kag magbalik sa gobyerno kag magpangabuhi sang normal.
