KORONADAL CITY- Nagpagawa sang kalain sang buot ang pila ka mangunguma sa probinsya sang South Cotabato kaangot sa suno pa selective nga paghatag sang loan program para sa mga mangunguma nga apektado sang kontrobersyal nga Rice Tarrification Law.
Sa interbyu sang Bombo Radyo Koronadal kay Joseph Martin, isa ka local farmer halin sa Bo. 3 Norala, South Cotabato, gintilawan suno pa nila nga magpadulong sa talatapan sang DA sa probinsya agud maka avail sang nasambit nga programa apang napaslawan suno pa sila bangud limitado lamang ang sarang maka avail sini.
Bangud sini dismayado suno pa si Martin kag ang kaupdanan sini ngga mangunguma bangud sila nga mga local farmers ang pinakaapektado sang panubo sang baklanay sang palay halin sang ginpatuman ang Rice Tarrification Law.
Luyag suno pa nila nga athagon sa Dept. of Agriculture kun paano kag kun sanday sin-o ang nagakadapat nga magbenepisyo sa nasambit nga programa.
Nahibaluan nga nagsugod na ang loan program sang gobyerno para sa mga mangunguma sang bulan sang Setymbre, 2019 kun sa diin target sang nasambit nga financial assistance nga mabuligan ang mga local farmers sa epekto sang Rice Tarrification Law makaligad magtibusok ang baklanay halin sa P20/kg sa P14/kg.
Sakop sang nasambit nga programa ang mga mangungima nga nagapanag-iya lamang sang isa ka ektarya nga kadutaan ukon mas dyutay pa agud maka avail sang P15,000 nga loan nga ila pagabayaran sa sulod sang walo ka tuig.
Bukas naman ang Bombo Radyo Koronadal para sa bahin sang Department of Agriculture.
