Iga patawag sa masunod nga semana si Inday Pasayan nga isa ka vlogger matapos mag-viral sa social media ang video sini nga may kaangtanan sa isa ka Person With Disability nga bulag sa diin nagkahatag sang madamo nga reaksyon.
Ini ang ginpahayag ni Mayor Clemente Fedoc sang banwa sang Norala sa interview sang Bombo Radyo Koronadal.
Suno kay Mayor Fedoc, nakabaton siya sang mga report halin sa katawhan kaangot sa nagalapta nga video sa diin gina alegar nga wala gin respeto sang nasambit nga vlogger ang isa ka PWD nga persona.
Dugang pa kay Mayor Fedoc, may nakatalana na nga magkadto sa iya ang nasambit nga vlogger agud nga iya ini istoryahon kung ano amtood nga natabo.
Gindugang pa ni Mayor Fedoc, nga sa subong wala pa sang ordinansa ang munisipyo nga nagabawal ukon nagadumili sa mga vlogger nga nagaubra sang bastos nga content sa ila lugar.
Nagpanawagan si Mayor Fedoc, sa mga content creator nga gamiton ang ila plataporma sa paghimo sang mga video nga makabulig kag makahatag sang maayo nga imahe sa banwa.
