KORONADAL CITY – Nagpanindugan si Koronadal City Sports Coordinator Jonari Javellana nga wala ini nakahibalo nga nakapagkit ang pangalan sini sa mga jersey sang mga kabataan nga magasali sa Batang Pinoy 2019 sa Palawan.
Sa eksklusibo nga interbyu sang Bombo Radyo Koronadal kay Javellana, ulihi na sang ila matukiban ang nasambit nga kapaltahan kun sa diin yara sa jersey sang mga atleta ang pangalan niya bilang sports coordinator, pangalan ni Koronadal City Mayor Eliordo Ogena kag ang logo nga Bagong Koronadal.
Kaangot sini, ginhatagan punto ni Javellana nga naistorya na sini ang supplier sang jersy kag pagahimuan na suno pa sang remedyo agud makakas ang mga pangalan sa mga bayo sang atleta nga indi kinahanglan nga gubaon ang bayo.
Dugang pa ni Javellana nga madamo na sang jersy ang nadistribwer na sa mga atleta apang pagahimuan lamang sang pamaagi agud nga indi maapektuhan ang ila performance sa game.
Kaangot sini, nagpangayo man sang paghangop si Javellana nga kun tani pamatian suno pa ang iya bahin makaligad man mabiktima sang pagpang bash sa social media.
Samtang, ginkakibot naman suno pa ni Mayor Eliordo Ogena nga nalakip man ang pangalan sini sa mga jersy sang mga kabataan nga atleta sa ginapatigayon nga Batang Pinoy 2019 sa bahin sang Palawan.
Sa interbyu sang Bombo Radyo Koronadal kay Mayor Ogena, nakahibalo ini nga bawal ang pagbutang sang iya nga pangalan kag kun sin-o man nga mga opisyal sang gobyerno bangud maga gwa nga epal sila nga mga sahi sang opisyales.
Kaangot sini ginmando ni Ogena ang pagpakakas sang pangalan ukon kun pwede mag usar sang puti na lamang nga bayo agud nga indi malamuran sang pagpamulitika ang nasambit nga hinampang.
Gin ako man sang alkalde nga nagakabalaka man ini makaligad man maglapta sa social media ang laragway sang mga jersy nga may tatak sang ila pangalan.
Ginpahayag pa sang alkalde nga wala siya sang ihibalo angot dire kag iya ini paga imbestigaran.
