Nagpaambit sang update sa iya kahimtangan sa ikaayong lawas ang aktres kag Quezon City Councilor nga si Aiko Melendez, ilabi na ang iya ginaatubang nga kondisyon sa thyroid.
Sa isa ka social media post, ginpahayag ni Melendez nga nagpakonsulta siya sa isa ka endocrinologist kag ginpahanumdom ang publiko nga indi pagpabay-an ang mga senyales nga ginahatag sang lawas.
Nagpasalamat man siya sa tanan nga nagpadala sang pangamuyo kag mensahe sang suporta.
Gin-anunsyar man sang aktres nga nakaagi siya sang thyroid biopsy antes sang thyroid scan kun sa diin base sa inisyal nga assessment, ang iya thyroid nodules nagapakita nga posible nga benign ukon indi cancerous, apang nagahulat pa siya sang opisyal nga resulta sang biopsy.
Ginpahayag ni Melendez nga ang thyroid scan makabulig sa paghibalo sang kahimtangan kag pag-function sang iya thyroid gland kag mga nodules, ilabi na bangud may hypothyroidism siya.
Gindugang niya nga ang timprano nga pagpacheck-up, regular nga konsultasyon kag pagsalig sa mga doktor importante agud mabaton ang nagakaigo nga bulong.
