KORONADAL CITY- Nagapadayon sa gihapon ang imbestigasyon sang Lambayong PNP sa probinsya sang Sultan Kudarat makaligad ang nagluntad nga pagpangluthang sa banwa sang Lambayong.
Suno sa mga otoridad, nagluntad ang krimen sa Purok Namnama, Brgy. Poblacion, Lambayong Sultan Kudarat samtang sakay sa motorsiklo ang isa ka mister kag an asawa sini nga si Remesyl Orbigo Valdez, 39 anyos nga isa ka empleyado sang LGU Lambayong kag residente man sang nasambit nga lugar.
Samtang ginapadulungan suno pa sang mag-asawa ang dalan gulpi na lamang sila gintupadan sang duha ka lalaki ng sakay man sa motorsiklo kag gilayon nga ginpangluthang.
Naigo sa kilid sang iya lawas ang misis sini apang nahimo pa nga alalayan sang iya mister apang liwat sila gintayaan sang armas luthang ka ginluthang liwat ang asawa sini tubtob sa nahulog na ini sa motorsiklo.
Nag-angkon sang apat ka igo sang bala sa nagkalain lain nga bahin sang iya nga lawas ang babaye nga biktima nga nangin kabangdanan sang iya gilayon nga kamatayon.
Sa karon indi pa matumod ang matuod nga motibo sang nasambit nga pagpangluthang.
Nahibaluan nga ini na ang ikaapat nga insidente sang pagpangluthang sa banwa sang Lambayong sa sulod lamang sang isa ka semana.
