KORONADAL CITY – Gindula sang Phivolcs ang kabalaka sang publiko kasunod sang mabaskog nga 6.2 magnitude nga linog nga nag-igo sa Davao region.
Ini makaligad nga napagkit ang sentro sang pagtay-og sa 92 kilometro southeast sang Governor Generoso, Davao Oriental.
May kadalumon ini nga 76 kilometro kag tectonic ang origin.
Sa interbyu sang Bombo Radyo Koronadal kay Nanie Danlag sang Phivolcs-12, napagkit ang intensity 5 sa Mati; intensity 4 sa Gensan, Kiamba, Alabel, Glan kag Malungon; samtang intensity 3 naman sa Tupi, Maitum kag diri sa siyudad sang Koronadal.
Lauman man ang mga aftershocks kasunod sang nasambit nga linog.
Samtang, wala naman sang may gin-isyu nga tsunami warning matapos ang kalamidad.
Sa pihak sini, nagpanawagan si Danlag labi na sa mga nagapuyo malapit sa mga kadagatan nga mangin alerto kag maghalong.
