Padayon nga ginamonitor sang Armed Forces of the Philippines (AFP) ang mga kahimtangan sa Middle East bangud sang nagapadayon nga tensyon sa tunga sang Iran kag Israel.
Sa isa ka pulong nga ginpatigayon sa Villamor Airbase, ginpahayag ni Lt. Gen. Padilla nga nakahanda ang militar nga magbulig sa mga Pilipino nga kinahanglan sang suporta bangud sang masami nga delikado nga sitwasyon sa lugar.
Suno kay Padilla, handa man ang AFP sa posible nga repatriation ukon pagpauli sang mga Pilipino nga naipit sa sigalot sa tunga sang duha ka nasud.
Ginpahayag man niya nga magahimo sila sang aksyon depende sa direktiba kag polisiya sang mga mas mataas nga sibilyan nga otoridad.
Ginsiguro sang AFP nga handa na ang ila mga assets kag kagamitan para magamit sa operasyon sang gobyerno sa paglilikas sang mga Pilipino ini suno sa direktiba ni Pangulong Ferdinand Marcos Jr., nga amo ang ila Commander-in-Chief.
Sa subong, ginapahayag sang AFP nga magapadayon sila sa pagsuporta sa mga inisyatibo sang gobyerno agud masiguro nga maluwas kag protektado ang mga Pilipino nga apektado sang krisis.
Samtang kabahin sang programa subong nga adlaw sa Villamor Airbase, ginpasidunggan man ang Bombo Radyo Philippines bilang Top Media Outlet (Radio) tungod sa ila papel sa paghatag sang impormasyon kag balita nga may kahilabtanan sa proteksyon sang siguridad kag soberanya sang Pilipinas.
