KORONADAL CITY – Naka-alerto sa subong ang mga katapo nga Joint-Task Force Central kag 6ID Philippine Army sa posibilidad sang retaliatory attack halin sa mga terrorista nga Dawlah Islamiyah-Hassan Group makaligad ang madinalag-on nga pag kubkub sang mga otoridad sa isa sa mga kuta sang mga ini sa diin ginkapatay sang 5 ka mga bomber sa nasambit nga grupo.
Ini ang nangin pahayag ni Lt. Col. Dennis Almorato, sa interbyu sang Bombo Radyo Koronadal.
Suno sa opisyal, naga padayon ang pagpahugot sang ila nga pamunuan sa bilog nga probinsya sang Maguindanao kag mga kaiping nga mga ka-probinsiyahan agud nga malikawan ang posibilidad nga pagbalus sang mga ini.
Madumduman,narekober ang walo ka bomba kag lima naman ka miyembro sang terorista nga Dawlah Islamiyah-Hassan Group ang patay sa ginhiwat nga operasyon sang Joint Task Force Central sa mga lugar sang Pagalungan at Montawal, Maguindanao del Sur.
Suno sa opisyal, plano sang sang mga nasambit nga grupo nga magpamomba sa mga matao nga lugar sang Maguindanao kag Cotabato kadungan sang pag umpisa sang Ramadan.
Gilayon naman nga nagpatigayon sang operasyon ang JTF Central agud punggan ang pano sang mga terorista nga grupo.
