Ginpagwa sang Armed Forces of the Philippines (AFP) ang video nga nagapakita sang pagpang-agaw sang Chinese agents sang supplies nga gin-airdrop para sa Filipino troops sa BRP Sierra Madre sa Ayungin Shoal.
Ginpahayag man sang AFP nga ang Chinese agents ang naggamit sang delikado nga maneuvers matapos nag-drive sang tuman ka lapit sa Filipino soldiers.
Samtang, ginpakita man sang Philippine Navy ang isa ka video nga nagakontra sa pahayag sang Chinese state media nga ang Filipino troops ang nagtaya sang armas sa Chinese agents sang Mayo 19 nga una na nga ginpanginwala sang militar.
Base sa video nga ginhatag sang Philippine Navy, ang Chinese agents ang nagpalapit lima tubtob 10 ka metros sa BRP Sierra Madre sang ang ikaduha sa apat ka batch sang suplay ang ginhulog sa lugar.
Ang Chinese agents, nga posible nagikan sa China Coast Guard ukon People’s Liberation Army, ang naggamit sang duha ka inflatable boats samtang ang Filipino personnel ang naggamit naman sang duha ka rubber boats agud magkuha sang suplay.
Samtang nga gina-agawan ang suplay, isa ka Filipino personnel ang mabatian sa video nga nagahambal nga ang isa ka Chinese agent ang nadagdag sa ila inflatable boat.
Sang ulihi, ang isa sa package ang nakuha gid sang mga Chinese.
