KORONADAL CITY- Ginpasakaan na sang kaso sang National Union of People’s Lawyer (NULP) sa Department of Justice ang 3 ka army officials kag 3 ka barangay officials sa South Cotabato bangud suno pa sa kaangtanan sang mga ini sa madinuguon nga engkwentro sa banwa sang Lake Sebu.
Kaso nga seven counts of murder kag two counts of frustrated murder ang ginsang-at nga kaso sang NULP nga amo ang nagarepresenta sa pamilya sang mga biktima.
Lakip sa mga ginkasuha amo sanday Major General Noel Clement, commander sang 10th Infantry Division kag mga subordinates sini nga sanday Lt. Col. Harold Cabunoc, commanding officer sang 33rd IB kag Lt. Col. Benjamin Leander, anay commander sang 27th IB.
Respondent man sa kaso si Barangay Captain Bebot Nobleta, Kagawad Melencio Tungkay kag IPMR Arturo Labi, nga lunsay mga opisyal sang Barangay Ned sa Lake Sebu.
Gin-akusaran sang NULP ang mga respondents nga amo ang nagpatay sa 7 ka miyembro sang Lumad sa nagluntad nga engkwentro sang Disyembre 3, 2017.
Lakip sa mga napatay sa engkwentro si Datu Victor Danyan Sr. kag iban pa.
Nahibaluan nga sa Manila ginsang-at ang kaso sa baylo nga sa South Cotabato bangud sa isyu sang seguridad.
Una diri, ginpahayag sa Bombo Radyo Koronadal ni CHR-12 Regional Director Erlanm Deluvio nga naggwa sa ila imbestigasyon nga wala sang encounter nga natabo bangud wala suno pa nagbato ang mga lumad nga napatay lakip na si Datu Danyan.
