KORONADAL CITY – Napunggan suno pa sang mga sundalo ang hana nga pag-atake sa mga CAFGU detachment sang Bangsamoro Islamic Freedom Fighters kaupod ang mga tinawo ni Datu Dima Maliba, anay commander sang 108th base command sang MILF.
Kaupod suno pa sang anay MILF Commander si Kumander Sheikh Sukarno sang BIFF.
Ini ang ginkumpirmar ni Lt. Col. Harold Cabunoc, commanding Officer sang 33rd IB, Philippine Army sa interbyu sang Bombo Radyo Koronadal.
Suno kay Cabunoc, gin-unahan na nila ang BIFF paagi sa pag-kanyon kaina sang aga sa kuta ni Datu Dima Maliba sa creek line sang Kulasi River nga
sugpon sang Liguasan Marsh nga yara sa boundary sang SK General Pendaton, Maguindanao kag Brgy Bagumbayan, President Quirino, Sultan Kudarat.
Apang, gina-validate pa sang mga suldado kun may napilasan sa bahin sang mga kaaway.
Suno sa iya, nahibaluan niya ang plano ni Datu Maliba matapos nga mapatay sa operasyon ang bata sini nga ginakabig nga notoryos nga carnapper sa Sultan Kudarat.
Nagbato suno pa ang bata ni Datu Maliba sa mga ototidad nga nagapatigayon nga Oplan Dakop matapos ang serye sang motornapping incident sa nasambit nga probinsiya.
Magluwas diri, kumpirmado man ang isa ka drug lord si Datu Maliba bangud ini ang dako nga supplier sang shabu sa probinsiya sang Maguindanao kag Sultan Kudarat.
