KORONADAL CITY – Nangin hugot ang seguridad nga ginpatuman sang mga Armed Forces of the Philipines kag Philippine National Police kadungan sang pagbisita ni Pangulong Ferdinand Marcos Jr sa South Cotabato
Ini ang ginkumpirma ni Police Col. Cydric Earl Tamayo, provincial director sang South Cotabato sa interbyu sang Bombo Radyo Koronadal.
Suno pa kay Tamayo, antes pa man ang aktibidad kaina, nag abot na ang advance party sang Presidential Security Group (PSG) agud ma-secure ang lugar na pagapadulngan sang Pangulo.
Nahibaluan nga nakadeploy naman ang mga suldado kag pulisya agud masiguro ang kaluwasan sang Pangulo kag mga kaupdanan sini nga magatambong sa nasambit nga programa.
Gintambungan sang Pangulo ang paglunsar sang Rice Farming Mechanization Program Processing Center sa Barangay Liwanay, Banga kung sa diin igapatindog ang rice mill para sa consolidated rice farming.
Samtang nagpaguwa naman sang Executive Order no. 39 si Koronadal City Mayor Eliordo Ogena may kaangtanan sa pagpasara sang pila ka mga dalan sa siyudad kag nagkansela man sang pipila ka mga klase kasubong sang KCES 1 KAG KCES 2, KNCHS agud indi maka disturbo sa mga dalan.
