KORONADAL CITY- Nagapangatubang sa kaso nga oral defamation kag direct assault ang Association of Barangay Councils ukon ABC President sang banwa sang Lake Sebu, South Cotabato nga si Simu Lumbay.
Ini makaligad nga ginsumbag sini ang duha nga on duty police sa kafiestahan sang Lake Sebu, South Cotabato matapos suno pa nga magmaoy.
Sa interbyu sang Bombo Radyo Koronadal kay Lake Sebu PNP Chief of Police Sr/ Insp. Renedel Gabuat Caierel, ginpahayag sini nga nakabaton sila sang report nga may nagamaoy sa ila municipal plaza rason nga gilayon nga ginkadtuan.
Pag-abot suno pa sa lugar naabtan ang ABC President nga nagamaoy rason nga gilayon ginpunggan kag ginhambalan.
Apang sa baylo nga mag untat, gilayon sini nga ginsumbag ang duha ka pulis nga ginkilala nga sanday PO2 Rey Batadlan kag SPO1 Tito Surungon.
Sa subong napasaka na ang kaso batuk sa nasambit nga opisyal.
